曼城讓波有隱憂

曼城在足協盃首回合主場失利，要再晉一級的確困難重重，今晚作客丹麥要反勝對手米迪蘭特真係談何容易，始終英超球隊出外比賽經常走樣，確係毫無信心，初盤仲要硬讓對手半球，真係捧唔過。

米迪蘭特的前鋒組合唔簡單，除了首回合成功突襲破“城”的射手丹尼奧臣之外，一對尼日利亞孖寶哥連斯與尼禾路同樣突破力強，如果曼城顧住狂攻而忽略防守的話，分分鐘再敗一仗，可能米迪蘭特整體實力未必夠曼城平均，但既然首戰可以贏波，球員自然信心大增，加上主場之利，至少可力保不敗。

曼城在聯賽終於打響頭炮，憑住巴西援將伊蘭奴出色表現，大勝韋斯咸三球，對今晚一戰可以回復比賽爭勝決心，另一巴西奧運腳袓奧已經歸隊，攻力亦會加強，新簽的比利時國腳高柏尼對韋斯咸一仗鎮守後防，表現出大將風範，記得在奧運分組賽對巴西一仗，雖然做“紅牌阿姑”，但準確包抄，出色攔截確係可造之才，希望今晚可以繼續有絕佳發揮，協助曼城絕地翻身。

推介：和波 1：1